Pequenos Xornalistas

 Ao mar fun por laranxas,

cousa que as augas non teñen,

viñen todo molladiño,

de ondas que van e veñen.

Teño unha nena en Ourense,

 e outra no Riveiro da Avia,

se a de Ourense é boa moza,

a do Riveiro xa gaña.

O cantar do Arrieiro,

é un cantar moi baixiño,

cántase en Rivadabia,

e síntese no Carballiño.

Non quero zapatos altos,

que se me espetan na area,

non quero amores de lonxe,

que os teño na miña aldea.

Mariaca se vas ao río,

ao río de lavar,

non torzas a roupa, Marica,

que a podes rachar.

O 64% dos nenos menores de 14 anos len por propia iniciativa

A poboación lectora creceu nos últimos anos a pesar do avance das novas formas de lecer tecnolóxico

Autor:   Luís Pousa
Data de publicación:   9/4/2008

Hai tan só unhas semanas un pesimista Philip Roth ditaba sentenza contra a cultura do papel. «As pantallas derrotáronnos», admitía abatido o autor de Zuckerman encadeado . Referíase, claro, ao efecto devastador que se presume que as novas tecnoloxías causaron na chamada galaxia Gutenberg. Segundo as teses máis catastrofistas, o libro é un animal en perigo de extinción ante o imparable avance de Internet, a televisión por cable e os videoxogos. Pero os queixumes dos que profetizan o apocalipse da letra impresa chocan coa contundencia dos datos.

O Anuario sobre o libro infantil e xuvenil 2008

, que acaba de publicar a editorial SM, sostén con cifras e estatísticas que hai unha canteira sólida: o 90% dos nenos menores de 14 anos len habitualmente e, o que é máis importante, entre estes, o 64% len por propia iniciativa, fronte ao outro 35,8% que o fan por recomendación (o que, á súa vez, se desglosa nun 12,7% que len ocasionalmente, aínda que non lles gusta e un 23,1% que o fan exclusivamente por obrigación escolar).

Segundo o estudo de SM, que recolle neste punto os datos do Informe de hábitos de lectura , a franxa de idade dos menores de 14 anos é a que posúe un índice de lectura máis elevado (90,3%), cifra que se vai reducindo paulatinamente a medida que aumenta a idade: de 14 a 24 anos len un 72,1%; de 25 a 34 anos, un 61%; de 35 a 44, un 60,1%; de 45 a 54 anos, un 56,2%; de 55 a 64, un 56,2%; e, de máis de 65 anos, un conciso 31,1%. De feito, engade o estudo de SM, o investimento de 150 millóns de euros que supuxo a posta en marcha do Plan de Fomento da Lectura traduciuse nos últimos catro anos nun crecemento do 6% da poboación lectora, que se sitúa agora nun 58% (dos cales un 59,6% son mulleres, e un 51,4%, homes). As estatísticas do último lustro veñen confirmar o perfil xa coñecido do lector medio español: muller novo , con estudos universitarios, que vive nunha gran cidade e que habitualmente le novelas.

Da consola ao MP3

O estudo de SM subliña o revolucionario cambio que experimentou o lecer dos nenos e mozos españois desde mediados dos anos noventa. Da rúa pasou ao fogar, concretamente á habitación dos pequenos, onde aniña o despregamento tecnolóxico. No seu cuarto, que era o lugar tradicionalmente destinado á lectura, os nenos dispoñen agora de Internet, televisión, videoxogos, teléfono móbil, MP3, lector de deuvedé e demais #aparato\\\ audiovisual. A metade navegan pola Red , un terzo posúen móbil propio e un 73,7% dispoñen de videoconsola, datos que, como apunta o informe, probablemente xa estean trasnoitados tras o bum de vendas do último Nadal.

Como contrapunto ao avance destas formas de lecer tecnolóxico, o anuario sinala o auxe da prosa fantástica (aí está o rotundo éxito de Harry Potter ) e a renovación dos álbums ilustrados, un xénero que en Galicia viviu un significativo crecemento (tanto en cantidade como en calidade) coa achega de selos como Kalandraka e Oqo. Dous indicios de que, con talento e imaxinación, talvez as pantallas non acaben derrotando á literatura.

La Voz de Galicia